Stalheimskleiva

Ein av dei brattaste vegane i Nord-Europa, bygd i perioden 1842-1846. Vegen slyngjer seg i 13 hårnålssvingar mot toppen, der ein finn Stalheim Hotell. På kvar side av kleiva kan ein sjå Stalheimsfossen (126 meter) og Sivlefossen (142 meter). Stalheimskleiva ligg ca. 35 km aust for Voss sentrum, langs E16 retning Oslo.

Tvindefossen

152 meter høgt fossefall ved Tvinde Camping, ca. 12 km nord-aust for Voss sentrum langs E16. Det er veg og deretter sti til toppen av fossen. Fint å kombinere opplevinga med ei lengre vandring langs sti eller stølsveg til Afdal-Prestølen eller Leidal-Hustveit. Ta kontakt med Voss Turistinformasjon for turforslag eller sjå bilvandring.no.

Utsikt frå Hanguren

I gangavstand frå Voss sentrum kan ein ta Hangursbana opp til Hanguren, 660 m.o.h. På utsiktskaféen har du panoramautsikt over Vossevangen og fjella rundt. Eit godt utgangspunkt for fjellturar i eit fint turterreng.

Vangskyrkja

Bygd i 1271 – 77 og ligg plassert midt i Voss sentrum. Vangskyrkja er ei brukskyrkje med gudsteneste kvar sundag kl. 11 og andre kyrkjelege tilskipingar. Om sommaren er kyrkja open for turistomvising. Brosjyre med nærare informasjon kan ein få i kyrkja.

Bordalsgjelet

Opplev villmarka i gangavstand frå Voss sentrum. Det djupe og dramatiske Bordalsgjelet er tilrettelagt for publikum med sti innover i gjelet, utsiktspunkt, informasjonstavler og benker. Her har du god utsikt til dei fantastiske jettegrytene, men hald deg til dei oppmerkte stiane. Fint å kombinere med eit besøk til Dagestad Museet som har ope 11 - 15, tysdag - laurdag  i juni t.o.m. 15. august.