Setesdalsmuseet på Rysstad tek deg med på ei vandring
i Setesdal sin kultur, historie og tradisjonar. Museet har eit lite utsal av suvenir og enkel servering.

”So gjekk me kledde i Råbyggjelaget” har vi kalla museet si nyaste utstilling. Råbyggjelaget er det gamle namnet på dei indre og vestre bygder i Aust-Agder, og hovudfokus er draktskikken i dette området.Utstillinga gjev oss glimt frå kvardagslivet, men fokuserer mest på livshøgtider som dåp, konfirmasjon og bryllaup. Tablå med dokker, i kombinasjon med tekster og eit rikhaldig biletmateriale, gjer fortida levande for oss. Sjå også filmen ”Eit anna Setesdal”, som viser at setesdølane ikkje berre var opptekne av det som hadde vore. Aldri før hadde setesdølane markert seg så kraftig i det offentlege liv som i tiåra før og etter år 1900.

”Kraftutbygginga i Setesdal” er via nyare historie. Meir enn anna har kraftutbygginga det siste hundreåret vore med på og lagt premissane for utviklinga i dalen. På godt og vondt er dalen avhengig at naturressursane vert brukt for å gi storsamfunnet elektrisitet. Naturen har fått vonde sår,men folk har fått arbeid og inntekter ein elles ville ha vore forutan.

Sommarutstillinga 2013 har ei litt anna vinkling enn det museet tradisjonelt har arbeidd med. Tema denne gongen er "Motorisert ferdsel i utmark". Målet er å setje fokus på ein aktivitet som etter kvart har ein lang tradisjon i bygdene i Setesdal, og som på godt og vondt er avgjerande for korleis mange setesdølar forheld seg til heia og bruken av denne.
Snøskuteren har gjort det mogeleg å bevare bygningar og rydde kulturlandskap som elles ville stått tilgrodd og i forfall. Samstunes inviterer den også til bruk som ikkje er ønskjeleg.

Setesdalsmuseet viser også ei utstilling med måleri frå Setesdal frå Sigurd G. Helle si samling.